Президент: "Мен сизлардан сўраб кўчага кирмайман!"

Тошкент шаҳри Учтепа туманидаги қатор объектларни кўздан кечирган президент Шавкат Мирзиёев айни пайтда туман фаоллари ва мутасаддилар билан учрашди.

“Мен бугун булар кўрсатган жойдан юрмадим. Мен сизлардан сўраб кўчага кирмайман. Бугун кирган жойимда тартибни кўрмадим. Наҳотки шуларни шунча ташкилот кўрмаса?! Қорлар вақтида куралмаган. Шу қадар музламаки, кексалар, ёш болалар юрса, йиқилиб жароҳат олади. Раҳбарлар қаёққа қараяпти, қани изланиш?

Албатта, Учтепа катта туман. Деярли 300 минг аҳолиси бор. Шунинг учун мен бош вазирни қайта-қайта бу туманга жўнатяпман. Агар биз муаммолар билан ишламасак, ёшлар билан шуғулланмасак, эртага бизнинг ёшларимиз билан бошқалар шуғулланади.

Яхши бўлиш учун тинимсиз ишлаш керак. Юз марта қилинган яхши ишларни битта ёмонлик, битта муаммо ювиб кетиши мумкин. Шунинг учун биз эрта тонгдан туриб енгни шимариб ишлашимиз керак”, деди президент.