Маскни танқид қилган журналистларнинг Тwitter саҳифаси блокланди

Илон Маск ўзи ҳақида танқидий ёзган бир неча таниқли журналистнинг Тwitter'даги аккаунтини тўхтатиб қўйди.

Маск шахсий маълумотларни чоп этишни тақиқловчи қоидалар барчага, жумладан, журналистларга ҳам тегишли экани ҳақида twit қолдирди. Яъни тадбиркорнинг сўзларига кўра, кимнингдир шахсий маълумотларини Тwitter'да ошкор қилиб бўлмайди.

Таъкидланишича, Илон Маск шахсий самолётини реал вақт режимида кузатиб борган журналистнинг саҳифасини тўхтатган. Тадбиркор ноябрь ойида Тwitter'даги сўз эркинлиги даражаси кенгайишини маълум қилган эди. Бироқ унинг бу ҳаракатлари ноябрдаги сўзларига мос келмайди.

Умуман олганда, Маскнинг Тwitter бошқарувига келиши компанияда бир нечта тартибсизликни келтириб чиқарди. У ижтимоий тармоқни харид қилиши билан топ менежерларни ишдан бўшатди ва ўрнига бошқаларни тайинлади. Бундан ташқари, компания ишчилари 50 фоизга қисқартирилди.

Шунингдек, Илон Маск Америка Қўшма Штатларининг собиқ Президенти Дональд Трампнинг Тwitter'даги ҳисобини қайта тиклади. Трампнинг ҳисобини тиклаш Маск Тwitter'нинг сиёсатини кескин ўзгартирганини англатади.

Албатта, Маскнинг ҳаракатлари Тwitter'да реклама берувчиларда ҳам хавотир уйғотди. Бироқ Амazon ва Аpple'нинг Тwitter'да реклама беришни давом эттириш қарори мутлақ ютуқ бўлди.

Эслатиб ўтамиз, Илон Маск жорий йилнинг 27 октябрида Тwitter'ни 44 миллиард евро эвазига сотиб олган эди.

Тesla акцияларининг нархи тушди

Тesla акциялари нархи кеча, икки йиллик энг паст даражага тушиб кетди.

Қайд этилишича, Тesla акциялари нархи жорий йил бошига нисбатан 60% га арзонлаган. Бунга бир қанча омиллар сабаб бўлган. Хусусан, сармоядорлар компания раҳбари Тwitter’га ҳаддан ташқари эътибор қаратаётгани ва бунинг натижасида Тesla қаровсиз қолаётганидан норози бўлмоқда. Шунингдек, Илон Маск ўзига тегишли бўлган тахминан 3,6 миллиард долларлик акцияларни сотганидан сўнг нархлар 12%га арзонлагани ҳам сармоядорлар норозилигини оширди. 

Кўплаб таҳлилчилар ҳам Маскнинг Тwitter эгаси сифатидаги хатти-ҳаракатлари Теsla компаниясига қимматга тушишини айтмоқда. Таъкидланишича, Маскнинг баҳсли ҳаракатлари Тesla имиджига салбий таъсир кўрсатиши мумкин. Шунингдек, Goldman Sachs инвестицион банки вакиллари ҳам Теsla акцияларини 305 доллардан 235 долларгача пасайишини прогноз қилган. Уларнинг хулосасига кўра, макроиқтисодий қийинчиликлар шароитида электромобилларга талабнинг камайиши ушбу қимматли қоғозлар нархининг ҳам тушишига олиб келади.

Илон Маскнинг Neuralink компаниясига нисбатан тергов бошланди

Америка Қўшма Штатлари Федерал органлари Илон Маскка тегишли Neuralink компаниясига нисбатан тергов бошлади. Бунга ҳайвонлар устида ўтказилган тажрибалар сабаб бўлган.

Маълумотларга кўра, тергов Қишлоқ хўжалиги департаменти бош инспектори идорасининг сўровига асосан компания ходимларининг ҳайвонлар устидан тажриба ўтказишни тартибга солувчи АҚШ қонунчилигини бузганлиги ҳақидаги шикояти туфайли бошланган.

“Reuters” компаниянинг бир неча ўнлаб ҳужжатлари билан танишиш, шунингдек, Neuralink'нинг 20 нафар собиқ ва ҳозирги ходимлари билан суҳбатлашишга муваффақ бўлган. Суҳбатдошларнинг сўзларига кўра, синовлар шошқалоқлик билан ўтказилган, бу эса синовдан ўтган ҳайвонларнинг ортиқча азоб-уқубатларига ва ўлимига сабаб бўлган.

Агентликнинг ҳисоб-китобларига кўра, Neuralink 2018 йилдан буён ўтказилган тажрибалар давомида 1500 га яқин ҳайвонлар, жумладан, 280 дан ортиқ қўй, чўчқа ва маймунлар нобуд бўлган. Бундан ташқари, сичқон ва каламушлар ҳам тажрибаларга жалб қилинган. Бироқ Маскнинг компанияси ўлган ҳайвонларнинг ҳисобини қатъий равишда юритиб бормайди.

Маълумот учун, Илон Маск Neuralink компаниясига 2016 йилда асос солган.