Чўчқа гриппи Ўзбекистонга кириб келганми?

Ижтимоий тармоқларда чўчқа гриппи дунёнинг бир неча мамлакатларида қайд этилаётгани тўғрисида хабарлар тарқалмоқда.

Шу ўринда бу касалликнинг белгилари ва ушбу касалликка қарши мамлакатимизда амалга оширилаётган ишлар юзасидан мутахассис ўз мулоҳазаларини билдирди.

— Чўчқа гриппи касаллигининг қандай аломатлари бор?

— Чўчқа гриппига шубҳа қилиш учун беморда белгилар билан биргаликда беморнинг касаллик тарқалган ҳудудларда бўлиши ва ушбу касалликка чалинганлар билан касаллик бошланишидан 7 кун олдин алоқада бўлган бўлиши эътиборга олиниши керак.

Гриппдан фарқ томонлари шундаки:

Одамлар орасида чўчқа гриппи инфекциясининг одатдаги клиник кўриниши мавсумий грипп ва бошқа ўткир юқори нафас йўлларининг инфекцияларига ўхшаш бўлиб, ҳароратнинг кўтарилишива нафас олиш тизимида яллиғланиш белгиларининг юзага келиб йўтал, ангина, фарингит, буруннинг битиши каби белгиларнинг пайдо бўлишидир, айрим ҳолатларда қусиш ва ич кетиш аломатлари юзага келиши мумкин.

Одамлар одатда чўчқа гриппини касалланган чўчқалардан юқтиришади, баъзи ҳолларда одамдан одамга юқиш кузатилган, аммо бу касал одамлар билан яқин алоқада бўлган одамлар ва одамлар гуруҳлари билан чекланган.

Касаллик фақат махсус лаборатор текшириш усуллари билан тасдиқланади.

Чўчқа гриппига чалинган (гумон қилинган) беморлар дарҳол юқумли касалликлар касалхонасида махсус ташкил этилган госпиталга, гумон қилинганлар бўлса, улар провизор госпиталга, мулоқотда бўлганлар эса изоляторга ётқизилади. Бемор тўлиқ тузалгунча даволанади, алоҳидаланиб (изоляция), тиббий кузатув остига олинади.

Агарда яқинда чет эл давлатидан қайтиб, соғлигингизда безовталик сезсангиз дарҳол шифокорга мурожаат қилинг.

— Айтинг-чи, мазкур касаллик Ўзбекистонга кириб келганми?

— Ҳеч қандай хавотирга ўрин йўқ. Республикамизда чўчқа гриппи касаллиги аниқланмаган. Эпидемик вазият эса барқарор.

Республикамиз ҳудудига четдан чўчқа гриппи касаллиги кириб келган тақдирда ҳам ўчоқни қамраб олиш (локализация) ва тугатиш (ликвидация) бўйича барча чора-тадбирлар бошқа ўткир респиратор касалликларида қандай ўтказилса, чўчқа гриппида ҳам худди шундай тадбирлар амалга оширилади.